Fargeplan for Odda sentrum
Trolltunga, frukthagar – og husa på Kalvanes! Dette er kanskje dei mest fotograferte motiva av turistar som besøker indre Hardanger.
Den fargerike husrekka vest i Odda har skapt stor interesse blant besøkande. På Instagram er det populært å dele bilete av byggjefeltet Kalvanes, som ligg på vestsida av Odda sentrum. Her lyser ei rekke fargerike hus opp.
Bakgrunnen for dei spreke fargevala både på Kalvanes og i Odda sentrum generelt har historisk med Smelteverket å gjere: Der ein i andre tettstadar fritt kunne mala husa kvite tidleg på 1900-talet, gjorde fabrikkstøvet i Odda at kvite hus var vanskelege å halde reine, og dermed malå folk husa sine med varmare fargar. Fargane grøn, oker og raud vart typiske for Odda.
Men då smelteverket stengde dørene i 2003 og støvet frå fabrikken la seg, byrja kvitfargen å ta over i bybildet. Ullensvang kommune ser med uro på utviklinga, og frykter at dette særtrekket ved Odda kjem til å tape seg om utviklinga held fram.
I 1997 utførde NIKU ei kartlegging som munna ut i ein fargeplan for Odda. Denne er tilgjengeleg for alle byens innbyggjarar som inspirasjon, og vi oppmoder huseigarar til å kikke på denne før ein velgjer farge.
Kanskje kan vi saman ta vare på noko av identiteten til Odda gjennom større kunnskap om den tradisjonelle fargebruken?
