Vaksinering mot sesonginfluensa, covid-19 og lungebetennelse

Her finn du informasjon om vaksinetilbodet i kommunen hausten 2026, kven som bør ta vaksinane og og korleis du kan førebyggje smitte.

Målet med vaksenvaksinasjonsprogrammet er å førebyggja sjukdom og dødsfall. Alle som er 65 år og eldre, samt andre i risikogrupper, får tilbod om vaksine mot influensa og korona kvart år.

Les meir om vaksenvaksinasjonsprogrammet her.

Kvar og når kan du vaksinera deg?

I november og desember arrangerer kommunen eigne vaksinedagar.

Tid og stad: Influensa, korona og pneumokokk vaksinering
Stad og lokale	Dag og dato	Tidspunkt og oppdeling
Jondal (Vikevollen)	Onsdag 18. november	Kl. 09.00 - 12.00 og 13.00 - 14.30
Utne (Utneheimen)	Torsdag 19. november	Kl. 09.00 - 12.00 og 13.00 - 14.30
Kinsarvik (Fjordahallen)	Måndag 23. november	Etternamn A - L: Kl. 09.00 - 12.00 Etternamn M - Å: Kl. 13.00 - 14.30
Odda (Bokkotunet)	Onsdag 25. november	Etternamn A - L: Kl. 09.00 - 12.00 og 13.00 - 14.30
Odda (Bokkotunet)	Torsdag 26. november	Etternamn M - Å: Kl. 09.00 - 12.00 og 13.00 - 14.30
Odda (Bokkotunet)	Onsdag 2. desember	Oppsamlingsdag for heile kommunen Kl. 09.00 - 12.00 og 13.00 - 14.30
Røldal (Bygdaheimen)	Torsdag 3. desember	Kl. 10.00 - 14.00
Odda (Bokkotunet)	Onsdag 9. desember	Oppsamlingsdag for heile kommunen Kl. 09.00 - 12.00 og 13.00 - 14.30

Tilbod til spesielle grupper

Barn og unge i risikogruppene kan få vaksine på helsestasjonen. Ta kontakt med Helsestasjonen for å avtale tidspunkt.
Bebuarar på sjukeheim får tilbod om vaksine der dei bur.
Personar som mottek tenester frå heimebasert omsorg kan, etter individuell vurdering, få tilbod om vaksinering i heimen. Dette gjeld kun dei som grunna nedsett funksjonsnivå ikkje kan ta seg ut av heimen for å få vaksinen hos fastlege, på kommunale vaksinedagar eller på apotek.
Helsepersonell får tilbod om vaksine frå arbeidsgjevar.

Prisar og eigenbetaling

Du betalar ein eigenandel når du tar vaksine. Du kan betala med bankkort eller Vipps på vaksinedagane. Vel de å ta fleire vaksinar samstundes (samvaksinasjon), vert eigenandelen lågare.

Prisane nedanfor gjeld for personar i risikogruppa.

Prisar: Influensa, korona og pneumokokk vaksinering
Type vaskine	Pris	Ved samvaksinasjon
Sesonginfluensa	308	-
Covid-19	110	85
Pneumokokksjukdom (Fødd i 1960 og 1961)	110	85

Rabatt på pneumokokkvaksine (lungebetennelse)

Fødd i 1961 (fyller 65 år i 2026): Får tilbod om pneumokokkvaksine til rabattert pris gjennom vaksenvaksinasjonsprogrammet.
Fødd i 1960: Får også vaksinen til rabattert pris dersom du ikkje tok den i 2025.
Eldre enn 66 år eller andre i risikogrupper: Må betala full pris og ta vaksinen hjå fastlegen sin.

Kven bør ta vaksinane?

Kven bør ta influensavaksine?

Influensavaksinen blir anbefalt kvart år til dei som har størst risiko for å bli alvorleg sjuke dersom dei får influensa. Dette gjeld særleg:

Bebuarar på sjukeheim
Personar frå 65 år og oppover
Gravide i 2. og 3. trimester
Prematurt fødde barn, særleg dei som er fødde før veke 32 i svangerskapet, frå 6 månader til 5 år.
Barn og vaksne med kroniske sjukdomar, som til dømes:
- hjarte- og lungesjukdom
- diabetes
- nedsett immunforsvar
- kronisk alvorleg nevrologisk sjukdom eller skade
- kronisk alvorleg nyresjukdom eller leversjukdom
- fedme (BMI over 40)
- Annan alvorleg og/eller kronisk sjukdom der influensa utgjer ein alvorleg helserisiko, etter individuell vurdering av lege.

I tillegg blir vaksinen anbefalt til:

Helsepersonell med pasientkontakt
Personar som bur saman med, eller har nær kontakt med, personar i risikogruppene

Kven bør ta koronavaksine?

Folkehelseinstituttet tilrår ei oppfriskingsdose for følgjande grupper:

Personar 75 år og eldre
Bebuarar i omsorgsbustader og sjukeheimar
Personar i alderen 18–74 år som høyrer til ei risikogruppe
Ungdom 12–17 år med alvorleg grunnsjukdom
Barn frå 6 månader til 11 år med alvorleg grunnsjukdom, etter individuell vurdering av behandlande lege
Personar som bur saman med (eller er tilsvarande nære) immunsupprimerte
Personar mellom 65 og 74 år som ikkje er i risikogruppe kan få vaksine gjennom vaksinasjonsprogrammet, til same eigendel som risikogruppene.

Kven bør ta pneumokokkvaksine?

Året du fyller 65 år får du tilbud om pneumokokkvaksine gjennom vaksenvaksinasjonsprogrammet, og kan ta vaksinen på kommunale vaksinedagar. Andre i risikogrupper som ynskjer pneumokokkvaksine må ta kontakt med fastlege.

Vaksinen er anbefalt til følgjande grupper:

Alle som er 65 år eller eldre
Nedsett immunforsvar (enten på grunn av sjukdom eller bruk av medisinar, til dømes HIV, immunsvikt, kreftsykdom)
Kronisk lungesjukdom
Kronisk hjartesjukdom
Kronisk nyresjukdom
Kronisk leversjukdom
Diabetes
Barrieresvikt (cochleaimplantat eller CSF-lekkasje)
Manglande milt eller miltfunksjon
Nedsett lungefunksjon (til dømes ved slag eller multippel sklerose)
Andre med auka risiko etter individuell vurdering

Praktisk informasjon om vaksineringa

Ta fleire samtidig: Alle tre vaksinane kan setjast på same tid.
Påkledning: Bruk gjerne klede med laus arm eller t-skjorte slik at overarmen er lett tilgjengeleg.
Effekt: Full effekt er forventa 10–14 dagar etter vaksinering. Best verknad får du ved å vaksinera deg i perioden oktober til desember.
Sjukdom: Dersom du har feber eller er sjuk, må du venta med vaksinering til du er feberfri.
Biverknadar: Det er vanleg å kjenna litt ømheit i armen, få litt feber eller kjenna seg trøytt det første døgnet.

Gode råd mot smitte

FHI rådar oss til å skjerpe hygienerutinane om vinteren for å unngå smitte av sesonginfluensa og andre sjukdomar.

Slik vernar du deg mot smitte:

Vaksiner deg dersom du er i ei risikogruppe.
Hald avstand frå folk som er sjuke.
Vask hendene grundig og ofte, særleg etter å ha vore på stadar med mange folk og før du et. Såpe og vatn er førstevalet, men alkoholdesinfeksjon er eit godt alternativ når hendene er tørre og ikkje synleg skitne
Unngå å røre ved ansiktet med uvaska hender.
Ved direkte kontakt med sjuke kan bruk av munnbind vurderast.

Slik tek du omsyn dersom du er sjuk:

Host eller nys i eit papirlommetørkle som du kastar etter bruk, og vask hendene etterpå. Dersom du ikkje har lommetørkle, host i albogen.
Ved nyoppståtte luftvegssymptom med feber og redusert allmenntilstand bør du halde deg heime. Barn bør også vere heime frå barnehage eller skule.
Unngå kontakt med personar som er ekstra utsette.

Aktuelle sider no

Vaksinering mot sesonginfluensa, covid-19 og lungebetennelse

Innhaldsliste

Kvar og når kan du vaksinera deg?

Tilbod til spesielle grupper

Prisar og eigenbetaling

Rabatt på pneumokokkvaksine (lungebetennelse)

Kven bør ta vaksinane?

Praktisk informasjon om vaksineringa

Gode råd mot smitte

Slik vernar du deg mot smitte:

Slik tek du omsyn dersom du er sjuk:

Informasjon på ulike språk

Influensavaksine

Koronavaksine

Pneumokokkvaksine

Skriv til oss

Besøk oss

Snakk med oss