Informasjon frå Jondal skule

Elevar i grunnskulen har rett til 10 timar leksehjelp i løpet av grunnskulen Kommunen har vedteke at dette tilbodet ikkje gjeld for 1.–4. klasse, og difor er det elevane på 5.–10. klasse som får tilbodet.

Påmeldinga skjer ved skulestart via føresettappen «Min skole». Dersom det blir behov for endringar i løpet av skuleåret, kan dette meldast direkte til kontaktlærar.

Skulen tilbyr leksetid:

• 5. - 6. klasse: tysdag kl. 13:00 - 14:00
• 7. - 10. klasse: onsdag kl. 14:00 - 16:00

I leksetida skal elevane sitja i ro og gjera lekser. Den vaksne hjelper kvar elev i den grad det er tid til det. Det er ikkje mogeleg å sitja med kvar elev gjennom heile leksetida.

Heimen har ansvar for å følgja opp eleven og sjå at leksa er gjort slik dei ynskjer den skal gjerast. Munnleg aktivitetar (t.d. leselekse i norsk og engelsk), er det ekstra viktig at heimen følgjer opp.

Me jobbar med uteskule på heile barneskulen, 1. - 7. klasse. Målsetjing for dette arbeidet er at alle elevane skal bli trygge ute i naturen, vane med å vera ute i all slags vær, bygge sosiale relasjonar, og læra gjennom å bruka heile kroppen. Leiken står sentralt. 

I Jondal har me mykje spennande å utforske i nærområdet, og me er opptekne av at elevane skal bli kjent både med lokale stader, plassar å vera og gå turar til, og dei historiske røtene til området. Me har samarbeid mellom anna med Viketunets venner, Herand kulturhistoriske senter, og skulemuseum. Hardangerakademiet på Jonatun ligg like ved skulen, og dei samarbeider SFO og mellomsteg med om skulehage.

Elevane i 1. - 4 klasse har uteskule ca. ein halv dag kvar veke. Då nyttar me nærområdet, og innhaldet i uteskulen mykje fritt, og noko lærarstyrt. Fokus er relasjonsbygging gjennom leik, og læring gjennom naturleg aktivitet.

Elevane i 5. - 7. klasse har uteskule annankvar veke, men det skal vera rom for å gjennomføra spontan uteskule dersom det er mogleg og trong for det.
Innhaldet på uteskule kan vera både lærarstyrt og fritt. Det skal vera fokus på samhald, inkludering og meistring. Det er viktig å skape gode opplevingar saman i naturen. 

Me har temabasert fokus på uteskulen med desse tre temaene: 

• Sjø og fjøra
• Skog og fjell
• Hage og dyrking

Elevar får skuleskyss dersom dei har meir enn 2 km (1. klasse) eller 4 km (2. - 10. klasse) skuleveg. Ved farleg skuleveg kan kommunen innvilga skyss også ved kortare strekningar. 

Det går buss frå Herand, Årsand og Krossdalen om morgonen, slik at elevane er på skulen før oppstart kl. 08:20. Det køyrer buss tilbake kl. 12:50 og 14:00. Bussane går kvar dag det er skule.

Søknadsskjema og meir info om skuleskyss

Kvart skuleår skal kvar klasse velgje to klassekontaktar og to varaer frå foreldregruppa. Dei to varaene rykkjer automatisk opp til å bli klassekontaktar det påfølgjande året, så sant det ikkje oppstår særskilde hindringar.

Ein av klassekontaktane skal sitje i FAU eller vere vara, dette kan ikkje vere foreldre som er tilsette ved skulen. Medlemmene i FAU er klassekontaktane frå 2., 4., 6., 8. og 10. trinn, medan klassekontaktane frå 1., 3., 5., 7. og 9. trinn fungerer som varaer.

Om hausten blir klassekontaktane kalla inn til eit møte for gjennomgang av oppgåver og forventningar. Kvar klasse har ein eigen perm der det blir ført oversikt over oppgåver og kven som har hatt verva opp gjennom åra.

Klassekontaktane har ei særleg viktig oppgåve i å vera bindeledd mellom skule og foreldregruppa. I tillegg skal dei jobba for å styrkja det sosiale arbeidet i klassen, i samarbeid med dei andre foreldra og elevane. Det er forventa at det vert arrangert minimum ein aktivitet for klassen og foreldra ila året. Skulen sine lokale kan fritt lånast etter avtale.

Kva gjer klassekontakten?

Råd og utval ved Jondal skule

Elevane har med seg niste. Det er fint om elevane har ei drikkeflaska i sekken.

• Dei yngste elevane har moglegheit for å eta litt rundt kl. 09:00. 
• Eldre elevar kan ta med seg ei skive ut i fyrste friminutt kl. 09:50.

Skulen har ikkje høve til å varma mat til elevane i skuletida. Me oppfordrar til sunn og næringsrik mat.

Elevane kan bestilla seg drikka m.m. gjennom skolelyst.no. Dette vert levert på skulen, og delt ut i klassane kvar dag.

Elevar som går på SFO treng ei eiga niste til dette. SFO har måltid kl. 14:00 - 14:30. Det er mogleg å bestilla eiga drikke til SFO gjennom skolelyst.no, eller eventuelt ta med. Av og til vert det laga mat på SFO, då vil det koma ut informasjon om dette.

Gjennom året har skulen nokon fellesmåltid for alle elevane på skulen. Det kjem ut informasjon om dette på førehand.

Innesko
Inne på skulen brukar me innesko, flipflops eller liknande. Elevane bytter frå utesko til innesko i garderobe. Dette skaper eit betre innemiljø, og sparar reinhald for arbeid. Ein kan nytte skoa ein brukar i hallen til innesko i klasserommet.

Sko til aktivitetar i hallen
Elevane treng sko i hallen som er berekna på hallen. Dette betyr at det ikkje kan vera mørk såle som set merker i golvet. Skoa skal ikkje nyttast ute, men vera innesko. Elevane kan nytte same skoa til innesko i klasserommet.

Ytterklede
Elevane treng sko og klede som høver til været. For dei yngste elevane kan det vera praktisk å ha eit regnsett eller ein vinterdress hengande på skulen. Elevane er mykje ute, og trivst betre om dei har klede som høver til været.

Byteklede
Elevane kan ha behov for byteklede ila skuledagen. Foreldra må passe på at elevane har nødvendig byteklede liggjande på skulen, eventuelt vera med i sekken.

Merking av klede, sko og utstyr
Det er viktig at alle klede, sko og anna utstyr som eleven har på seg eller med seg på skulen er merka med namn. Det er fort gjort å legge noko frå seg, og det er kjekkast visst me finn eigaren med ein gong.

Attgløymde klede, sko og utstyr
Jamnleg vert det gløymt att klede, sko og anna utstyr. Dette vert lagt i hylla utanfor symjehallen og fleirbrukshallen. Fint om elevar/foreldre sjekkar innom der av og til, det er ikkje alltid ein veit at noko er gløymd. Ta kontakt dersom de saknar noko.