Merknad til forskrift for viltområdet i kommunen

Bakgrunn

Ny lov om jakt, fangst og felling av vilt mv. (viltressurslova) tredde i kraft 01. juli 2026. Samstundes blei viltlova (lov 29. mai 1981 nr. 38 om jakt og fangst av vilt) oppheva. 

Føremålet med ny viltressurslov er å sikra at forvaltning av viltressursane gjennom jakt, fangst, felling og anna handtering av vilt skjer på ein berekraftig og forsvarleg måte, i samsvar med naturmangfaldlova og dyrevelferdslova.

Den nye viltressurslova inneber fleire endringar for kommunane, og det er dette som er bakgrunnen for at framlegg til ny forskrift på viltområdet no kjem på høyring.

Bruk av termiske og restlysforsterkande siktemiddel

I den nye viltressurslova er det i utgangspunktet lagt inn forbod mot bruk av termiske og restlysforsterkande siktemiddel ved jakt, jf. § 26. Termiske og restlysforsterkande siktemiddel har før dette vore lovleg å nytte til jakt. For at det framleis skal vera lovleg å nytte til jakt, går det fram av forskrift om utøvelse av jakt, felling og fangst at kommunane kan fastsetje forskrift som vidarefører bruk av termiske og restlysforsterkande siktemiddel ved jakt etter hjort i ope terreng, jf. § 29 a fjerde ledd. Det er ikkje fastsett overgangsordningar av departementet for innføring av endringane. Ullensvang kommune har difor valt å sende ut til høyring framlegg til lokal forskrift, med sikte på at termiske og restlysforsterkande siktemiddel framleis skal vera lovleg til hjortejakt. Dette kjem fram av § 3 i framlegg til ny forskrift.

Tiltaket er retta mot å gjera jakta meir effektiv der problema er størst, slik at ein kan oppnå betre regulering av hjortebestanden. Dette er i samsvar med kommunen sitt ansvar for ei berekraftig hjorteviltforvaltning basert på lokale forhold og skadeomfang. For å sikra at lokale forskriftstekster for bruk av termiske og restlysforsterkande siktemiddel på tvers av kommunar blir mest mogleg like, har kommunen vore i dialogmøte i regi av Vestland fylkeskommune. Det er dette som er bakgrunnen for formuleringa i forskrifta § 3.

Samordning av reglar for viltområdet i Ullensvang kommune

For å bidra til eit klårare regelverk, har kommunen valt å samla alle reglar som skal gjelda for viltområdet i Ullensvang kommune til ei forskrift. Dette innber at gjeldande forskrifter om tilgang til jakt og fastsetjing av minsteareal for felling av elg, hjort og rådyr for tidlegare Odda kommune, Ullensvang herad og Jondal kommune blir samla og vidareført i nytt framlegg til forskrift i § 1 og § 2. Det er ikkje føreslått endringar av desse reglane.

Med innføring av ny viltressurslov er det eit krav at kommunar som vil krevja inn fellingsavgift for elg og hjort må fastsetja dette i forskrift. Landbruksdirektoratet sin anbefaling er at kommunen fastset ei felles forskrift for tilgang til jakt, fastsetjing av minsteareal og fastsetjing av fellingsavgifter. Kommunen har difor valt å fastsetja fellingsavgift for hjortevilt i framlegg til ny forskrift, slik at kommunen kan krevja inn fellingsavgift for kvart dyr som blir felt innanfor rammene fastset av Stortinget. Dette går fram av § 4 i forskrifta. Ullensvang kommune har per dags dato fastsett fellingsavgift i gebyrregulativet. Desse satsane vil gjelde for jaktsesongen 2026-2027 og § 4 i ny forskrift vil difor tre i kraft frå 01. februar 2027.

Kommunen vurderer at ei samordning av regelverket på viltområdet vil gi betre struktur og enklare tilgang til reglane for både kommunen og brukarar. Framlegg til forskrift om tilgang til jakt, fastsetjing av minsteareal, bruk av termiske siktemiddel og fastsetjing av fellingsavgift for hjortevilt, Ullensvang kommune, Vestland, vil erstatte gjeldande enkeltforskrifter.

Høyringsfrist

Frist for å kome med innspel eller merknadar er satt til 10. august. Denne fristen er dessverre kortare en kommunen vanlegvis vil nytte ved ei offentleg høyring. Dette for at bruk termiske og restlysforsterkande siktemiddel framleis skal vera lovleg til hjortejakt for jaktsesongen 2026-2027, har kommunen funnet det naudsynt med kortare høyringsfrist. Saka vil opp til politisk handsaming i september.

Innspel og merknadar kan sendast til Ullensvang kommune gjennom digitalt skjema, på e-post eller per brev. Merk då innspel med saksnummer 26/2134.
 

• Frist for å komme med innspel: 10. august

Vedlegg til sak

• Framlegg til: Forskrift om tilgang til jakt, fastsetjing av minsteareal, bruk av termiske siktemiddel og fastsetjing av fellingsavgift for hjortevilt, Ullensvang kommune, Vestland (PDF, 63 kB)