Utskriving av eigedomsskatt 2025 – offentleg gjennomsyn
Eigedomsskatteliste 2025
På bakgrunn av kommunestyret sitt vedtak (KST-128/24 og 129/24) om utskriving av eigedomsskatt for 2025, og med heimel i eigedomsskattelova § 15, vert eigedomsskattelista lagd ut til offentleg gjennomsyn i minst tre veker etter at det er kunngjort at lista er lagd ut. Lista vert lagd ut før 1. mars kvart år på kommunen si heimesida og på Ullensvang rådhus.
Lista viser dei skattepliktige eigedomane med adresse, matrikkelnummer (gards-, bruks-, feste- og seksjonsnummer), eigedomsskattetakster, skattesats og utrekna eigedomsskattebeløp. I ei tilleggsliste vert eigedomar som har fritak for eigedomsskatt oppført. Listene vert ikkje oppdatert med korreksjonar som følgje av rettingar eller klagebehandling gjennom året.
- 2025 Eigedomsskatteliste – offentleg gjennomsyn
- 2025 Eigedomsskatteliste fritak – offentleg gjennomsyn
Eigedomsskattesetel
Samstundes med at eigedomsskattelista vert utlagd, får eigar (skattytar) tilsendt eigedomsskattesetel med informasjon om takst og utrekna skatt, samt informasjon om klagerett. Eigedomsskattesetel vert sendt ut i eiga sending. Skattesetelen skal innehalda eigedomsnummer, eigedomsskattetakst, skattesats, skattebeløp og informasjon om klagerett. Vert skatten for ein eigedom mindre enn kr 300, skal det ikkje skrivast ut skatt jf. eigedomsskattelova § 14.
Informasjon om klagerett
Klagefrist for eigedomsskatten 2025 er 12. april 2025.
Klage kan bli fremja kvart år i samband med den årlege utskrivinga av eigedomsskatt, dersom det ikkje er klaga på same grunnlag tidlegare år jf. eigedomsskattelova § 19. Klagenemnd for eigedomsskatt er klageinstans for takstvedtak fatta av Sakkunnig nemnd for eigedomsskatt. Dersom klagar ikkje får medhald eller berre delvis medhald hos Sakkunnig nemnd for eigedomsskatt, går saka vidare til Klagenemnd for eigedomsskatt.
Eigedomsskatten vert fakturert kvartalsvis (forfall 20. mars, 20. juni, 20. september og 20. desember). Eigedomsskatten skal betalast til forfall sjølv om du har sendt inn klage jf. eigedomsskattelova § 25. Ta gjerne kontakt med eigedomsskattekontoret dersom du treng hjelp til å klage.
Skattesats 2025
Den alminnelege eigedomsskattesatsen for 2025 er 7 promille jf. kommunestyrevedtak 18.12.2024 og eigedomsskattelova §§ 10 og 11.