Informasjon om mindre avløpsanlegg (slam)

Søknaden er ikkje rekna som fullstendig før alle nødvendige vedlegg ligg føre. Manglar det vedlegg, kan ikkje kommunen behandle søknaden. 

Under finn du ei forklaring knytt til dei ulike vedlegga som skal følge skjema, og nedst på sida finn du vedlegg til nedlasting.

1. Namn på nøytral fagkyndig (person/firma
   • Her skal du føre opp kven (nøytral fagkyndig person / firma / leverandør) som har hjelpt deg med utforming og dimensjonering av reinseanlegg, og dokumentasjon av reinsegrad. Ver merksam på at dokumentasjon av reinsegraden til anlegget skal vere utført av ein nøytral fagkyndig
   • Dersom du skal installere eit ferdigprodusert minireinseanlegg, må dette vere testa i samsvar med NS-EN 12566-3. Sjekk at reinsegraden som er ført opp på CE-merket til minireinseanlegget, tilfredsstiller reinsekravet for ditt utslepp (du har ført opp reinsekrav under punkt 5).
   • For alle andre reinseløysingar må du dokumentere at du har nytta anerkjend dimensjonering og utforming.
      
2. Grunngiving for ønske om unntak frå standardreinsekrav §§ 12-8 til 12-9 / lokale reinsekrav eller relevant dokumentasjon
   • Dersom du søkjer om unntak frå reinsekrav, skal du grunngi dette særskilt.
     Ver merksam på at dersom du søkjer om unntak, gjeld utsleppsløyve ikkje kommunen sin absolutte saksbehandlingsfrist på seks veker.
      
3. Dokumentasjon av reinsegrad, jamfør § 12-10, og beskriving av anlegg
   • Ver merksam på at dokumentasjonen skal vere utført av fagkyndig. Vedlegget skal også innehalde ei beskriving av anlegget (type/modell/leverandør og så vidare) og korleis det skal drivast
      
4. Plassering av avløpsanlegg, utsleppsstad, eigedomsgrenser og vegtilkomst (for slamtømming, vedlikehald og så vidare) på kart i målestokk 1:5000 eller større
    
5. Liste over eigedommar som er tilknytte avløpsanlegget med gardsnummer, bustadnummer og adresse
   1. Dersom du skal knyte deg til eit eksisterande reinseanlegg, må du leggje ved ei liste over kva bygningar som allereie er tilknytte anlegget. Gardsnummer og bustadnummer for desse bygningane får du ved å kontakte kommunen. Dersom det ikkje er fleire bygningar knytte til anlegget, skal du setje kryss i boksen «ikke relevant» i søknadsskjemaet.
       
6. Oversikt over interesser som søknaden vedkjem (drikkevassforsyning, rekreasjon, næringsverksemd og så vidare). Beskriving av tiltak for å motverke interessekonfliktar og tiltak for å sikre helse og miljø
   • Brukarinteresser knytte til utsleppsstaden vil ha stor betydning for plassering og utforming av reinseanlegg eller utsleppspunkt. Vedlegget skal innehalde ei vurdering av interesser som kan/vil bli rørte ved av utsleppet (for eksempel drikkevatn og brønnar, jordvatning, leikeplassar, bading, fiske, turløyper og så vidare), og plasseringa til utsleppsstaden når det gjeld brukarinteresser. Dersom du er i tvil, kan det vere nyttig å kontakte ein fagkyndig som kan gjere ei nøytral vurdering.
      
7. Oversikt over kven som er varsla
   • Alle naboar og aktuelle partar skal varslast 4 veker før søknaden blir send. 
   • Du må lage ei liste over kven som har blitt varsla, og du må leggje ved kvittering på at det er sendt varsel til dei respektive (for eksempel kvittering på rekommandert sending eller underskrift).
      
8. Eventuelle mottekne klagar/protestar
   • Dersom du har motteke klagar/protestar, skal dei leggjast ved søknaden. Dersom du ikkje har motteke klagar/protestar, kryssar du av i boksen «ikke relevant».

Les denne rettleiinga før du fyller ut søknadsskjemaet.

Fleire kommunar har utarbeidd eigne søknadsskjema for utslepp av avløpsvatn etter lokale krav. Kontakt derfor i første omgang kommunen for å høyre kva krav som gjeld i din kommune. Ver merksam på at kommunen kan krevje gebyr for saksbehandling av søknad om utslepp, jamfør § 11-4 i forureiningsforskrifta.

Du finn meir informasjon og rettleiing på

• avlop.no - Mindre avløpsanlegg
• norskvann.no

På avlop.no finn du også eksempel på utfylling av søknadsskjema med vedlegg.

Kven har søknadsplikt?

Utslepp av sanitært avløpsvatn er søknadspliktig, jamfør forureiningsforskrifta kapittel 12. Du må søkje kommunen om utsleppsløyve både når du skal etablere eit nytt utslepp, og når du skal auke eit eksisterande utslepp utover dei eksisterande rammene. Du må også søkje dersom du skal endre type utslepp eller utsleppsstad. Kontakt kommunen dersom du er usikker på om du treng søkje.

Det er søkjaren sitt ansvar å fylle ut ein nøyaktig og fullstendig søknad med alle opplysningane kommunen treng for å kunne behandle han. Kommunen startar behandlinga av søknaden når det ligg føre eit fullstendig utfylt søknadsskjema med alle nødvendige vedlegg. Kommunen behandlar søknaden innan 6 veker frå fullstendig skjema med vedlegg er motteke. Manglar det opplysningar eller dokumentasjon, vil dette kunne forseinke behandlinga. Dersom du har søkt om unntak frå standardkrava i forureiningsforskrifta kapittel 12, eller eventuelt frå lokale forskrifter, gjeld ikkje den absolutte saksbehandlingsfristen på 6 veker.

Kva må du gjere i god tid før du søkjer?

Ta kontakt med kommunen for å få vite kva krav og eventuelle lokale tilpassingar som gjeld der du vil sleppe ut avløpsvatn. Finn ut kva som er kravd av informasjon og dokumentasjon i ein søknad om utsleppsløyve. Kommunen har plikt til å gi rettleiing om korleis du skal søkje, og om kva vilkår og krav som gjeld. Du må også sjekke med plan- og byggjesaksavdelinga i kommunen om det planlagde avløpsanlegget er i samsvar med kommunen sine planar etter plan- og bygningslova. Dersom det ikkje er samsvar, må du hente inn samtykke. Det kan krevje politisk behandling.

Hent inn nødvendig informasjon og dokumentasjon. Det er du som søkjar som skal hente inn all nødvendig informasjon og vise at det planlagde utsleppet er i tråd med krava. Det kan ta tid å samle alt, så berekn god tid.

Du har plikt til å varsle naboar og andre spesielt involverte. Andre spesielt involverte kan for eksempel vere lag og foreiningar, eller andre som har friluftsinteresser i området. Når du sender varsel til desse, skal du samtidig sende kopi til kommunen. Dersom du er i tvil om kven som skal ha varsel, kan du få ei liste over desse frå kommunen. Varsel skal sendast ut med svarfrist på minimum fire veker. Du må sjølv sørgje for å få kvittering for at varselet er sendt (for eksempel kvittering på rekommandert brev, underskrift eller liknande).

Til søknaden må du leggje ved ei oversikt over kven som er varsla, kopi av varselet og kvitteringar (vedlegg G). Du må også leggje ved eventuelle fråsegner/protestar du har motteke (vedlegg H). Søknaden om løyve etter kapittel 12 kan ikkje sendast til kommunen før svarfristen på fire veker har gått ut.

Kva må sendast inn til kommunen, og korleis blir søknaden behandla?

Når du har fylt ut alle punkta i søknadsskjemaet og har lagt ved alle nødvendige vedlegg, har du levert det vi kallar ein fullstendig søknad. Ein fullstendig søknad skal behandlast av kommunen innan seks veker. Hugs at dersom søknaden manglar opplysningar eller dokumentasjon, vil dette kunne forseinke saksbehandlinga. Dersom du har søkt om unntak frå dei standardiserte reinsekrava i kapittel 12 eller lokale forskrifter, gjeld ikkje den absolutte saksbehandlingsfristen på seks veker.

1. Ansvarleg (søkjar)

Her skal du gi alle opplysningar som er nødvendige for at kommunen skal kunne kontakte deg eller sameiget/organisasjonen som søkjer om utsleppsløyve. Ansvarleg søkjar er normalt den som eig og driv anlegget (ansvarleg eigar / tiltakshavar), og som er ansvarleg for utsleppet, inkludert for drift og vedlikehald av anlegget. Dersom ansvarleg søkjar ikkje er den same som ansvarleg eigar, må du informere om det her. Handheving og sanksjonar etter regelverket vil skje overfor ansvarleg eigar.

2. Søknaden gjeld

Her skal du opplyse om søknaden gjeld eit nytt utslepp eller ein vesentleg auke av utsleppet. Du må opplyse om søknaden gjeld heilårsbustad, fritidsbustad og/eller annan bygning, og talet på bygningar i dei ulike kategoriane. Dersom det er eller skal installerast vassklosett, må du opplyse om det. Vesentleg auke kan vere at fleire område skal koplast til anlegget, installering av matkvern, vatn eller vassklosett. Ta kontakt med kommunen dersom du er i tvil om kva som er vesentleg auke.

3. Eigedom/byggjestad

Her skal du føre opp gardsnummer, bruksnummer (og eventuelt festenummer) og adresse på bygningen eller bygningane som skal knytast til avløpsanlegget. Dersom du ikkje kjenner gards-, bruks- og eventuelt festenummeret, kan du få vite det ved å kontakte kommunen.

Du må sjekke med kommunen om plasseringa og utføringa av det planlagde anlegget er i samsvar med kommunen sine planar etter plan- og bygningslova. Dersom utføringa og/eller lokaliseringa av reinseanlegget ikkje er i samsvar med kommunen sine planar, må du innhente samtykke frå planmyndigheita. Det kan krevje politisk behandling. Hugs å føre opp dato for kva tid samtykket blei gitt.

4. Utsleppsstad

Her skal du gi opplysningar om utsleppsområdet. Det vil seie om avløpsvatnet går til innsjø, bekk/elv, grunnvatn, elvemunning og så vidare. Du skal også føre opp namn på lokalitet og kartkoordinatar. Koordinatar kan du for eksempel finne på eit økonomisk kart/plankart i målestokk (1:5000) eller større frå Statens kartverk. Kart finn de på kommunekart.com, eller ved å ta kontakt med Kart og oppmåling i kommunen, eller på fylkeskartkontoret. 

Hugs å føre opp kva kartdata du bruker, for eksempel WGS 84.P.

Plasseringa og utsleppsstaden til avløpsanlegget skal merkjast av på kartet. På det same kartet skal du også merkje av eigedomsgrenser og eventuell vegtilkomst (for slamtømming, vedlikehald og så vidare). Legg kartet ved søknaden (vedlegg D).

Gjeld søknaden utslepp til vatn, må du føre opp kor mange meter under lågaste vasstand det skal sleppast ut (utsleppsdjupn).

Den forventa storleiken på utsleppet skal førast opp i talet på personekvivalentar (pe). Personekvivalentar er eit mål på mengda organisk materiale i avløpsvatnet. Du kan finne pe på fleire måtar, men dette er hovudreglane:

• Utslepp frå hus og hytter med innlagt vatn og vassklosett: 1 person bidreg med 1 pe.
• Utslepp frå hytter med innlagt vatn utan vassklosett: 1 person bidreg med 0,3 pe.
• Utslepp frå hytter utan innlagt vatn og vassklosett: 1 person bidreg med 0,1 pe.

Ta kontakt med kommunen dersom du er usikker på korleis du reknar ut den forventa storleiken på utsleppet.

5. Reinsegrad

Krava til reinsegrad i dei enkelte kommunane kan vere strengare enn standardkrava i kapittel 12. Ta kontakt med kommunen dersom du er usikker på kva reglar som gjeld. Oppdaterte lokale forskrifter finn du på lovdata.no.

Informasjonen om krava til reinsegrad som følgjer nedanfor, rettar seg mot standardkrava i forureiningskrava i kapittel 12.
Kva reinsekrav som gjeld på den staden der du planlegg utsleppet, er avhengig av om utsleppsstaden ligg i eit følsamt/normalt eller mindre følsamt område, om det er brukarkonfliktar involvert, og om det er fare for overgjødsling.

For å finne ut kva reinsekrav som gjeld på den staden du vil sleppe ut avløpsvatn, må du først finne ut om utsleppsstaden ligg i eit følsamt/normalt område eller i eit mindre følsamt område:

• Følsame/normale område er ferskvatn og kyststrekninga frå svenskegrensa til Lindesnes med tilhøyrande nedbørfelt og Grimstadfjorden-området (Nordåsvannet, Grimstadfjorden, Mathopen og Dolviken).
• Mindre følsame område er kystfarevatn og elvemunningar frå Lindesnes til Grense Jakobselv unnateke Grimstadfjorden-området.

Følsamt/normalt område
Dersom staden du vil sleppe ut til, er klassifisert som følsamt/normalt område, set du kryss i boksen «Utslippssted i følsomt/normalt område». Deretter må du vurdere eventuelle brukarkonfliktar og/eller fare for overgjødsling. Dersom det er brukarinteresser involvert, skal du krysse av i boks a, som er det strengaste reinsekravet. Dersom det derimot ikkje er brukarinteresser involvert, men fare for overgjødsling, kryssar du av i boks b, der reinsekravet ikkje er fullt så strengt som for a. Dersom det verken er brukarinteresser eller fare for overgjødsling, kryssar du av i boks c (det minst strenge kravet).

Gjeld søknaden berre gråvatn (avløpsvatn frå hushald som ikkje inneheld klosettvatn) som blir sleppt ut i stadeigne lausmassar eller liknande, skal du krysse av i boksen «stedegne løsmasser eller tilsvarende».

Mindre følsamt område
Dersom utsleppsstaden er eit mindre følsamt område, skal du setje kryss i boksen «Utslippssted i mindre følsomt område». Du må i tillegg spesifisere reinsegrad ved å krysse av for anten (a) 20 % reduksjon av suspendert stoff eller (b) maksimum 180 mg suspendert stoff/liter (årleg middelverdi). Gjeld søknaden gråvatn som skal sleppast ut til mindre følsam sjøvassresipient, er det ikkje krav til reinsing, og du kan krysse av i boksen «urenset».

Dersom du søkjer om unntak frå reinsekrava, skal du krysse av i boksen «Det søkes unntak fra §§12-8 til 12-9 / lokal forskrift». Hugs at du må leggje ved ei grunngiving/spesifisering for ønsket om unntak frå reinsekrava (vedlegg B).

Under punktet «Type renseanlegg» skal du oppgi kva slags reinseanlegg du ønskjer å installere. Gjeld søknaden minireinseanlegg, skal du også fylle ut «Tillegg for minirenseanlegg».

Den dimensjonerte storleiken på anlegget skal førast opp i talet på personekvivalentar pe. Dette finn du for eksempel i dokumentasjonen frå anleggsleverandøren. Når du skal vurdere kor stort anlegg du skal velje, bør du tenkje i eit perspektiv på 10 år. Anlegget bør uansett ikkje vere dimensjonert for mindre enn 5 pe.

6. Vedlegg til søknaden

Sjå punkt under.

7. Eventuelle merknader (ikkje obligatorisk)

Her kan du skrive eventuelle merknader som du meiner er nyttig informasjon for kommunen når søknaden skal behandlast.

8. Underskrift og erklæring

Merk at det er ansvarleg eigar som skal underteikne søknaden. Underskrifta til ansvarleg eigar står inne for at det er gitt riktige og fullstendige opplysningar. Eigaren forpliktar seg til å følgje dei oppførte føresegnene, inkludert føresegner som gjeld drift og vedlikehald.

Søknaden blir ikkje rekna som fullstendig før alle nødvendige vedlegg ligg føre. Dersom det manglar vedlegg, blir ikkje søknaden behandla. 

Under finn du ei forklaring knytt til dei ulike vedlegga som skal følge skjema, og nedst på sida finn du vedlegg til nedlasting.

1. Namn på nøytral fagkyndig
   • Her skal du oppgi kva for nøytrale, fagkyndige personar, firma eller leverandørar som har hjelp deg med å utforme, dimensjonere og installere reinseanlegg, og med å dokumentere reinsegrad. Hugs at dokumentasjon av reinsegraden til anlegget skal vere utført av nøytral fagkyndig.
   • Reinseanlegg mellom 50 og 1000 pe i mindre følsamt område kan ha dokumentasjon som alternativ til årleg prøvetaking. Dersom du ikkje gjennomfører årleg prøvetaking, må du dokumentere at godkjend dimensjonering og utforming er nytta, og du må dokumentere reinsegraden.
      
2. Grunngiving for ønsket om unntak frå §§ 13-7 til 13-16 og relevant dokumentasjon
   • Dersom du søkjer om unntak frå reinsekrav, skal du grunngi det særskilt. Hugs at dersom du søkjer om unntak frå krav, gjeld ikkje den absolutte saksbehandlingsfristen til kommunen på seks veker.
      
3. Beskriving av anlegg og dokumentasjon på korleis utslepp skal etablerast og drivast. Kravet gjeld ikkje for infiltrasjonsanlegg.
   • Her skal du opplyse om leverandør, modell og så vidare for anlegget, og dokumentere at anlegget skal etablerast, drivast og haldast ved like av fagkyndige, jamfør krav til utforming og drift i § 13-11, krav til prøvetaking i § 13-12, krav til analyse i § 13-14 og krav til vurdering av analyseresultat i § 13-15.
   • Informasjon om godkjende minireinseanlegg finst på heimesidene til SINTEF. Godkjenningsbeviset skal leggjast fram i samband med søknader om bruk av minireinseanlegg.
      
4. Beskriving av anlegg og dokumentasjon av reinsegrad som alternativ til prøvetaking, sjå § 13-13. NB! Gjeld berre for infiltrasjonsanlegg som ikkje gjennomfører årleg prøvetaking.
   • Reinseanlegg med naturleg infiltrasjon kan ha dokumentasjon som alternativ til årleg prøvetaking. Det skal liggje føre dokumentasjon på at storleiken og plasseringa til anlegget er tilpassa dei aktuelle vassmengdene og grunnforholda på staden. Dokumentasjonen skal omfatte grunnundersøkingar og innehalde informasjon om hydraulisk kapasitet, infiltrasjonskapasitet, eigenskapane lausmassen har som reinsemedium, og risiko for forureining. Naturleg infiltrasjonsanlegg skal i tillegg ha dokumentasjon på at det er brukt godkjend dimensjonering og utforming. Hugs at dokumentasjonen skal vere utført av fagkyndig.
      
5. Plassering av avløpsanlegg, utsleppsstad, eigedomsgrenser og vegtilkomst for slamtømming, vedlikehald og så vidare på kart i målestokk 1 : 5000 eller større
   • Kart i målestokk 1 : 500 eller 1 : 1000 er å føretrekkje.
      
6. Liste over eigedommar som er tilknytte avløpsanlegget, med gardsnummer, bruksnummer og adresse
   • Dersom du skal knyte deg til eit eksisterande reinseanlegg, må du leggje ved ei liste over kva bygningar som alt er knytte til anlegget. Gardsnummer og bruksnummer for desse bygningane får du ved å kontakte kommunen. Dersom det ikkje er fleire bygningar knytte til anlegget, skal du setje kryss i boksen «ikkje relevant».
      
7. Oversikt over interesser som utsleppet får følgjer for, som drikkevassforsyningar, rekreasjon og næringsverksemd
   • Brukarinteresser som er knytte til utsleppsstaden, vil vere svært viktige for plasseringa og utforminga av reinseanlegg eller utsleppspunkt. Vedlegget skal innehalde ei vurdering av interesser som utsleppet kan eller vil påverke, til dømes drikkevatn, bading, fiske, turløyper og næringsinteresser, og av plasseringa til utsleppsstaden i forhold til brukarinteressene. Ta kontakt med kommunen og eventuelt ein fagkyndig dersom du har problem med å fylle inn relevant informasjon på dette punktet.
      
8. Oversikt over kven som er varsla, og kopi av kvitteringar
   • Du må lage ei liste over kven som har blitt varsla, og leggje ved kvittering på at det er sendt varsel, til dømes kvittering på rekommandert sending eller underskrift.
      
9. Eventuelle klagar og protestar som er mottekne
   • Dersom du har fått klagar eller protestar, skal du leggje dei ved søknaden. Dersom du ikkje har fått klagar eller protestar, kryssar du av i boksen «ikkje relevant».

Les denne rettleiinga før du fyller ut søknadsskjemaet.

Normalt er det kommunen som søkjer om utslepp etter kapittel 13. Det er òg som regel kommunen sjølv som eig avløpsanlegget. Vi minner om at det i desse tilfella må vere ei klar delegering av myndigheit internt i kommunen for å unngå inhabilitet. Aktørar i kommunen som står for drift og vedlikehald av avløpsnettet, reinseanlegget og slamhandteringa, skal aldri samtidig vere forureiningsmyndigheit.

Partslag kan i nokre tilfelle søkje om løyve til eit kapittel 13-utslepp, så sant kommunen har godteke at partslaget eig det aktuelle avløpsanlegget. Sjå lov om kommunale vass- og avløpsanlegg dersom du vil ha meir informasjon om reglar for eigarskap til avløpsanlegg.

Fleire kommunar har utarbeidd eigne søknadsskjema om utslepp. Kontakt derfor i første omgang kommunen for å høyre om det er spesielle lokale forhold du bør vere klar over. Ver merksam på at kommunen kan krevje gebyr for saksbehandling av søknad om utslepp, jf. § 11-4 i forureiningsforskrifta.

Du får meir informasjon og rettleiing ved å kontakte kommunen og på norskvann.no. Norsk Vann har mellom anna eit stort rapportarkiv som kan vere til stor hjelp og nytte.

Kven har søknadsplikt?

Anten du skal etablere eit nytt utslepp av avløpsvatn eller vil auke eit eksisterande utslepp vesentleg, må du søkje kommunen om utsleppsløyve. Vesentleg auke vil ofte seie at utsleppsmengda aukar med 25 prosent eller meir, at det er endring i type utslepp eller endring i utsleppsstad. Kontakt kommunen dersom du er usikker på om du treng å søkje.

Søkjaren har ansvar for å fylle ut ein nøyaktig og fullstendig søknad med alle opplysningar som forureiningsmyndigheita i kommunen treng for å kunne behandle han. Kommunen tek til å behandle søknaden når eit fullstendig utfylt søknadsskjema med alle nødvendige vedlegg ligg føre.

Kommunen behandlar søknaden innan seks veker frå fullstendig utfylt skjema med alle vedlegg er motteke. Dersom det manglar opplysningar eller dokumentasjon, kan det forseinke behandlinga. Dersom du har søkt om unntak frå standardkrava i forureiningsforskrifta kapittel 13, gjeld ikkje den absolutte saksbehandlingsfristen på seks veker.

Kva må du gjere i god tid før du søkjer?

Ta kontakt med kommunen for å få vite om eventuelle lokale tilpassingar som gjeld der du vil sleppe ut avløpsvatn. Finn ut kva som krevst av informasjon og dokumentasjon i ein søknad om utsleppsløyve. Kommunen har plikt til å gi rettleiing om korleis du skal søkje om utsleppsløyve, og kva vilkår og krav som gjeld. Du må òg sjekke med plan- og byggjesaksavdelinga i kommunen om det planlagde avløpsanlegget er i samsvar med areal- og reguleringsplanane etter plan- og bygningslova. Dersom det ikkje er samsvar, må du hente inn samtykke. Det kan krevje politisk behandling.

I samsvar med lov om kommunale vass- og avløpsanlegg skal det i utgangspunktet vere kommunen som eig avløpsanlegg som er større enn 50 pe. Dersom du ønskjer å utvide drifta ved eit privat anlegg, slå det saman med eit anna anlegg eller etablere eit nytt anlegg i privat regi, må du kontakte kommunen og få godkjenning før du søkjer om utsleppsløyve jf. lov om kommunale vass- og avløpsanlegg §§ 1-2.

Skaff nødvendig informasjon og dokumentasjon. Det er du som søkjar som skal skaffe all den nødvendige informasjonen og vise at det planlagde utsleppet er i samsvar med krava. Det kan ta tid å samle alt, så du må berekne god tid.

Du har plikt til å varsle partar som naboar og andre som utsleppet får konsekvensar for. «Andre» vil her seie til dømes lag og foreiningar. Når du sender varsel, skal du samtidig sende kopi til kommunen. Dersom du er i tvil om kven som skal ha varsel, kan du få ei liste over desse frå kommunen. Varsel skal sendast ut med svarfrist på minimum fire veker. Du må sjølv sørgje for å få kvittering for at varselet er sendt. Det kan til dømes vere kvittering på rekommandert brev eller ei underskrift.

Du må leggje ved oversikt over kven som er varsla, og kopi av varselet og kvitteringar (vedlegg H) saman med eventuelle fråsegner eller protestar du har fått (vedlegg I). Søknaden om løyve etter kapittel 13 kan ikkje sendast til kommunen før svarfristen på fire veker er ute.

Kva må sendast inn til kommunen, og korleis blir søknaden behandla?

Når du har fylt ut alle punkta i søknadsskjemaet og har lagt ved alle nødvendige vedlegg, har du levert det vi kallar ein fullstendig søknad. Ein fullstendig søknad skal kommunen behandle innan seks veker. Hugs at dersom søknaden manglar opplysningar eller dokumentasjon, vil det kunne forseinke saksbehandlinga. Dersom du har søkt om unntak frå dei standardiserte reinsekrava i kapittel 13 eller lokale forskrifter, gjeld ikkje den absolutte saksbehandlingsfristen på seks veker.

Korleis kan du klage på vedtaket?

Klagefristen er tre veker etter at vedtaket er motteke. Ein eventuell klage må sendast til kommunen innan tre veker. Klagen skal sendast til den etaten som gjorde vedtaket. Av klagen må det gå frem kva vedtak det blir klaga på, og klagen bør vere grunngitt. Dersom kommunen held oppe vedtaket, blir klagen vidaresend og behandla i klagenemnda til den aktuelle kommunen.

Kva blir det kravd av deg når anlegget er i drift?

Den som eig anlegget, pliktar å dimensjonere, drive og halde anlegget ved like, slik at ein førebyggjer lekkasjar og unngår sjenerande lukt, jamfør vilkåra i utsleppsløyvet. Kommunen kan òg fastsetje andre vilkår i utsleppsløyvet enn standardkrava i forureiningsforskrifta §§ 13-6 til 13-17 eller i samsvar med søknad. Du må oppbevare informasjon om anlegget, drift og lekkasjar i minst fem år, slik at han er tilgjengeleg dersom kommunen kjem på tilsyn. Eventuelle naboklagar skal òg oppbevarast i fem år.

Kommunen er myndigheit og fører tilsyn med at krava blir følgde. Kommunen har rett til uhindra tilgang for å inspisere anlegget, jf. forureiningslova § 50. Kommunen kan òg krevje gebyr for tilsyn, jf. forureiningsforskrifta § 11-4.

1. Ansvarleg (søkjar)

Her skal du gi alle opplysningar som er nødvendige for at kommunen skal kunne kontakte eininga i kommunen eller partslaget som søkjer om utsleppsløyve. Ansvarleg søkjar eig og driv anlegget og er ansvarleg for utsleppet, inkludert drifta og vedlikehaldet av anlegget.

Handheving og sanksjonar etter regelverket vil skje overfor den ansvarlege. Dersom ansvarleg søkjar ikkje er den same som ansvarleg eigar, må du oppgi det.

2. Søknaden gjeld

Her skal du oppgi om søknaden gjeld eit nytt utslepp eller ein vesentleg utsleppsauke. Vesentleg auke vil normalt seie at utsleppsmengda aukar med 25 prosent eller meir, at det er endring i type utslepp eller endring i utsleppsstad. For mindre anlegg vil utsleppet normalt auke vesentleg dersom ein installerer vassklosett, dusj, bad, våtrom og liknande. Vesentleg auke vil òg normalt vere tilfelle når eksisterande anlegg blir utvida, til dømes på grunn av at nye område blir kopla til anlegget. Endring av utslepp kan dessutan medføre at det er fare for nye eller større brukarkonfliktar. Ta kontakt med kommunen dersom du er i tvil om kva som er vesentleg auke.

3. Eigedom og byggjestad

Her skal du oppgi gardsnummer, bruksnummer og adresse til bygningen eller bygningane som skal knytast til avløpsanlegget. Gards- og bruksnummer får du ved å kontakte kommunen.

Du må undersøkje med kommunen om utføringa av det planlagde anlegget er i samsvar med dei kommunale planane etter plan- og bygningslova. Dersom utføringa eller lokaliseringa av reinseanlegget ikkje er i samsvar med dei kommunale planane, må du skaffe samtykke frå plan- og bygningsetaten. Hugs å oppgi dato for når samtykket blei gitt, og legg samtykket ved søknaden.

4. Utsleppsstad og storleik

Her skal du gi opplysningar om utsleppsområdet. Det vil seie om avløpsvatnet går til innsjø, bekk eller elv, elvemunning eller liknande. Du skal òg oppgi namn på lokalitet og kartkoordinatar. Kartkoordinatane finn du på eit økonomisk kart eller plankart i målestokk 1 : 5000 eller større frå Statens kartverk. Kart finn de på kommunekart.com, eller ved å ta kontakt med Kart og oppmåling i kommunen, eller på fylkeskartkontoret. Du kan òg til dømes bruke norgeskart.no frå Kartverket. 

Plasseringa av avløpsanlegget og utsleppsstaden skal merkjast av på kartet. På same kart skal du òg merkje av eigedomsgrenser og eventuell vegtilkomst (for slamtømming, vedlikehald etc.). På Seeiendom.no kan du skrive ut kart der gnr./bnr., eigedomsgrenser, namn, utskriftsdato og kartgrunnlag kjem fram. Legg ved kartet saman med søknaden.

Dersom søknaden gjeld utslepp til vatn, må du oppgi kor mange meter under den lågaste vasstanden avløpsvatnet blir sleppt ut (utsleppsdjupna).

Oppgi den venta storleiken på utsleppet i personekvivalentar (pe). Personekvivalentar er eit mål på mengda organisk materiale i avløpsvatnet. Ein kan finne pe på fleire måtar, men dette er hovudregelen:

• Utslepp frå hus og hytter med innlagt vatn og vassklosett: 1 person bidreg med 1 pe.
• Utslepp frå hytter med innlagt vatn utan vassklosett: 1 person bidreg med 0,3 pe.
• Utslepp frå hytter utan innlagt vatn og vassklosett: 1 person bidreg med 0,1 pe.

Ta kontakt med kommunen dersom du er usikker på korleis du bereknar den venta utsleppsstorleiken.

5. Reinsegrad

Kva reinsekrav som gjeld på den staden du vil sleppe ut avløpsvatn, er avhengig av om utsleppsområdet er klassifisert som normalt, følsamt eller mindre følsamt, sjå vedlegg til 1.1.2 c til forureiningsforskrifta § 11.

For å finne ut kva reinsekrav som gjeld på den staden der du vil sleppe ut avløpsvatn, må du først finne ut kva område utsleppsstaden ligg i:

• Følsamt eller normalt område: Ferskvassførekomstar. Kyststrekninga svenskegrensa–Lindesnes med tilhøyrande nedbørsfelt og Grimstadfjord-området inkludert Nordåsvannet, Grimstadfjorden, Mathopen og Dolviken i Hordaland
• Mindre følsamt område: Kystfarvatn og elvemunningar frå Lindesnes til Grense Jakobselv, bortsett frå Grimstadfjord-området i Hordaland

Følsamt eller normalt område: Dersom staden du vil sleppe ut til, er klassifisert som følsamt eller normalt område, set du kryss i boksen «Reinsegrad, jamfør § 13-7, følsamt eller normalt område». Dersom søknaden gjeld kommunalt avløpsvatn, skal du krysse av i boksen nedanfor, som har det strengaste reinsekravet.

Mindre følsamt område: Dersom staden du vil sleppe ut til, er eit mindre følsamt område, skal du setje kryss i boksen «Reinsegrad, jamfør § 13-8, mindre følsamt område». Du må i tillegg spesifisere reinsegraden ved å krysse av for anten a) 20 % reduksjon av suspendert stoff eller b) 100 mg suspendert stoff per liter (årleg middelverdi) i restkonsentrasjonen.

Dersom du søkjer om unntak frå reinsekrava, skal du krysse av i boksen «Søkjer unntak frå §§ 13-7 til 13-8». Hugs at grunngiving eller spesifisering for ønsket om unntak frå reinsekrav må leggjast ved søknaden som vedlegg 6b.

Det kan vere nyttig å ta kontakt med kommunen eller ein fagkyndig for å få nødvendig informasjon eller rettleiing om kva reinsekrav som gjeld der du planlegg utslepp. Du kan òg få ein fagkyndig til å gjere vurderingane for deg.

Under punktet «Type reinseanlegg» skal du oppgi kva slags reinseanlegg du ønskjer å installere. Dersom søknaden gjeld minireinseanlegg, skal du også fylle ut «Tillegg for minireinseanlegg».

Oppgi dimensjonert anleggsstorleik i personekvivalentar (pe). Det finn du til dømes i dokumentasjonen frå anleggsleverandøren. Vurdering av kor stort anlegg du skal velje, bør gjerast med eit perspektiv på ti år.

6. Vedlegg til søknaden

Sjå punkt under

7. Eventuelle merknader frå søkjaren

Her kan du skrive eventuelle merknader du meiner er nyttig informasjon for kommunen når søknaden skal behandlast.

8. Underskrift og erklæring

Med underskrifta di stadfestar du at du har gitt rette og fullstendige opplysningar. Du forpliktar deg òg til å følgje dei oppgitte føresegnene, inkludert føresegner som gjeld drift og vedlikehald.

Vedlegg som skal følgje skjema:

• Vedlegg a) Dokumentasjon frå nøytral fagkyndig (PDF, 96 kB)
• Vedlegg b) Grunngjeving for ønskje om unntak frå lokal forskrift og relevant informasjon (PDF, 57 kB)
• Vedlegg c) Dokumentasjon av reisegrad og skildring av anlegg (PDF, 261 kB)
• Vedlegg d) Krav til kart som vedlegg til utsleppssøknad (PDF, 354 kB)
• Vedlegg e) Liste over eigedomar knytt til avløpsanlegget om det er fleire enn ein eigedom (PDF, 66 kB)
• Vedlegg f) Oversikt over berørte (PDF, 109 kB)