Demensvennleg kommune

Vi er ein del av Demensvennleg samfunn i samarbeid med Nasjonalforeningen for folkehelsen. Gjennom denne ordninga arbeider kommunen for eit inkluderande lokalsamfunn der personar med demens blir møtt med forståing, respekt og tryggleik i kvardagen.

Kva betyr det å vere demensvennleg

Å vere ein demensvennleg kommune handlar om å auke kunnskapen om demens i lokalsamfunnet. Med meir forståing hos dei ein møter i kvardagen, til dømes i butikkar, tenester og organisasjonar, kan personar med demens meistre daglege aktivitetar betre, oppleve større sjølvstende og leve aktive og gode liv.

Kurs om demensvennleg samfunn

Som del av arbeidet blir det tilbydd kurs og opplæring i demensvennleg praksis. Opplæringa gir praktisk kunnskap om korleis ein kan møte personar med demens på ein god og inkluderande måte og er relevant for både offentlege tenester, bedrifter, lag og organisasjonar.

Målgruppe

Kurset er retta mot næringsliv, organisasjonar og offentlege instansar som møter publikum i kvardagen, til dømes butikkar, apotek, bibliotek, kollektivtrafikk, drosje, kafe og liknanade. 

Varigheit

Kurset varer i ca 1,5 timar.

Når og kvar

Kurset blir halde hos di bedrift eller organisasjon etter avtale, eller på felles arrangement som vert annonsert av kommunen. 

Kostnad

Kurset er gratis.

Demensvennlege bedrifter

Alle deltakarar får kursbevis etter gjennomført kurs. Når minst 50 prosent av dei tilsette i ei bedrift har gjennomført kurset, får verksemda eit klistremerke som kan plasserast godt synleg, til dømes ved inngangen. Dette viser at bedrifta er demensvennleg. 

Meir informasjon

Ønskjer di bedrift, organisasjon eller teneste meir informasjon eller å bestille kurs,  er de velkomne til å ta kontakt med demenskoordinator i kommunen.