Alarmar for tryggleik i heimen

Alarmar er ein type velferdsteknologi som kan gje auka tryggleik og sjølvstende i heimen. Det finnes ulike alarmar for ulike behov, til dømes for å tilkalle hjelp eller varsle om bevegelse. Ein utløyst alarm varslar kommunen sitt responssenter eller heimetenesta direkte. Det er heimetenesta der du bur som rykker ut på alarmar ved behov. 

Kven kan få tilbodet?

  • Du har funksjonsvanskar eller helseutfordringar der det kan oppstå behov for akutt hjelp. 
  • Du har stor risiko for å falle. 
  • Du kjenner deg i stor grad utrygg på grunn av sjukdom og/eller funksjonsnedsetting. 

Alarmar vert tildelt etter ei fagleg vurdering av behovet ditt. For å få tryggleiksalarm må du ha kognitiv og fysisk funksjonsevne til å bruke alarmen. 

Kva kan du få hjelp til?

Tryggleiksalarm
Tryggleiksalarmen har du på deg i heimen heile døgnet, slik at du kan tilkalle hjelp dersom du har akutt  behov for helsehjelp. Alarmen er enkel å bruke og er på storleik med eit armbandsur. Du kan ha den på handleddet eller som smykke.  

Varsling om bevegelse
Du kan få installert sensorteknologi som registrer om noko er unormalt i heimen din, t.d. om du om du opner ytterdøra eller er ute av senga om natta. 

Kva skjer når alarmen vert utløyst?
Når alarmar vert utløyst vert kommunen varsla. Responssenteret eller helsepersonell vil forsøke å få kontakt med deg og vurdere naudsynt oppfølging. Ved manglande kontakt, eller ved stadfesta behov, kjem nokon heim til deg for å hjelpe. 

Kva må du gjere?

  • Tryggleiksalarmen skal ikkje nyttast ved behov for ordinære omsorgsoppgåver som vert utført av heimetenesta. 
  • Du må gje løyve til at heimetenesta kan ta seg inn i heimen din ved hjelp av nøkkelboks eller digital lås. Dørlenker o.l. kan ikkje nyttast. 
  • Du må melde frå dersom du flyttar.
  • Du er ansvarleg for at apparatet vert forsvarleg behandla. Du må erstatte skade eller tap av utstyr. Vedlikehald og reparasjon som følge av vanleg bruk vert dekka gjennom eigenbetalinga.  
  • Tryggleiksalarmar, sensorar og nøkkelboks/digital lås må leverast inn til kommunen etter endt behov. Vi tek atterhald om retten til å inndra tryggleiksalarmar som ikkje vert nytta i tråd med kriteria. 

Slik søkjer du

Du søkjer om tryggleiksalarm ved å senda inn søknadsskjema for helse- og omsorgstenester. 

Søk om helse- og omsorgstenester

Søknad om helse og omsorgstenester (pdf)

Papirskjema kan sendast til: 

Ullensvang kommune v/Helse og omsorg
Avdeling for Forvaltning og koordinering 
Opheimsgata 31
5750 Odda

Pris

Eigenbetaling for tryggleiksalarm er eit månadsabonnement regulert i «Forskrift om eigenbetaling for kommunale helse- og omsorgstenester». Satsar for eigenbetaling vert vedteke av kommunestyret kvart år, utanom staten sine maksprisar. Prisen per 01.01.2025 er 306 kr i månaden.

Sjå her for alle kommunale avgifter, prisar og gebyr

Klage

Dersom du ikkje er nøgd med vedtaket, kan du klage. Klagen skal sendast til kommunen innan fire veker etter at du har mottatt vedtaket.

Lover og reglar

Tryggleiksalarm, og andre alarmar, er ikkje ei lovpålagt teneste, men ei serviceteneste.