Influensavaksine

Her finn du informasjon om korleis du kan vaksinere deg mot sesonginfluensa, og korleis du kan førebyggje smitte. 

Informasjon om 2025/26-sesongen kjem så snart den er klar. Sesongvaksinering vil vere tilgjengelig frå midten av oktober, og kommunale vaksinedagar vert arrangert mot slutten av oktober og i november. 

Kven bør ta influensavaksine?

Influensavaksinen blir anbefalt kvart år til dei som har størst risiko for å bli alvorleg sjuke dersom dei får influensa. Dette gjeld særleg:

  • Bebuarar på sjukeheim
  • Eldre frå 65 år og oppover
  • Gravide i 2. og 3. trimester
  • Prematurt fødde barn, særleg dei som er fødde før veke 32 i svangerskapet, frå 6 månader til 5 år.
  • Barn og vaksne med kroniske sjukdomar, som til dømes:
    • hjarte- og lungesjukdom
    • diabetes
    • nedsett immunforsvar
    • alvorleg nevrologisk sjukdom eller skade
    • kronisk nyresjukdom eller leversjukdom
    • fedme (BMI over 40)

I tillegg blir vaksinen anbefalt til:

  • Helsepersonell med pasientkontakt
  • Personar som bur saman med, eller har nær kontakt med, personar i risikogruppene 

Les meir om anbefalingar på Folkehelseinstituttets nettsider

Kvifor vaksinere seg?

  • Vaksinen reduserer risikoen for alvorleg sjukdom og komplikasjonar.
  • Du bidreg til å beskytte familie, vener og pasientar som kan vere ekstra utsette.
  • Vaksinen er trygg og enkel. Dei fleste får berre lette, forbigåande biverknadar. 

Kva vaksinar kan du ta samtidig? 

På dei kommunale vaksinedagane kan du få influensavaksine og koronavaksine samtidig. 

Kvar kan du vaksinere deg? 

Det vert arrangert vaksinedagar i kommunen som tidlegare år. Informasjon om dato og tidspunkt vert annonsert så snart det er klart.

Dersom du er i ei risikogruppe og ikkje kan nytte deg av kommunale vaksinedagar, kan du bestille time og ta influensavaksine hos fastlegen din.  

Apotek og andre private aktørar har også tilbod om influensavaksine for alle som ynskjer.  

Spesielle grupper: 

  • Barn og unge i risikogruppene kan få vaksine på helsestasjonen. 
  • Bebuarar på sjukeheim får tilbod om vaksine der dei bur. 
  • Personar som mottek tenester frå heimebasert omsorg kan, etter individuell vurdering, få tilbod om vaksinering i heimen.  Dette gjeld kun dei som grunna nedsett funksjonsnivå ikkje kan ta seg ut av heimen for å få vaksinen hos fastlege, på kommunale vaksinedagar eller på apotek. 
  • Helsepersonell får tilbod om vaksine frå arbeidsgjevar. 

Kva kostar det å vaksinere seg? 

Informasjon om pris vert oppdatert så snart det er klart. 

Gode råd mot influensasmitte

FHI råder oss til å skjerpe hygienerutinane om vinteren for å unngå smitte av sesonginfluensa.

Slik vernar du deg mot smitte:

  • Vaksiner deg dersom du er i ei risikogruppe.
  • Hald avstand frå folk som er sjuke.
  • Vask hendene grundig og ofte, særleg etter å ha vore på stadar med mange folk og før du et. Såpe og vatn er førstevalet, men alkoholdesinfeksjon er eit godt alternativ når hendene er tørre og ikkje synleg skitne
  • Unngå å røre ved ansiktet med uvaska hender.
  • Ved direkte kontakt med sjuke kan bruk av munnbind vurderast.

Slik tek du omsyn dersom du er sjuk:

  • Host eller nys i eit papirlommetørkle som du kastar etter bruk, og vask hendene etterpå. Dersom du ikkje har lommetørkle, host i albogen.
  • Ved nyoppståtte luftvegssymptom med feber og redusert allmenntilstand bør du hald deg heime. Barn bør også vere heime frå barnehage eller skule.
  • Unngå kontakt med personar som er ekstra utsette.
  • Risikogrupper kan bruke munnbind innandørs ved høg smitte.